Туулын хурдны замын төслийн үйл ажиллагааг түр зогсоолоо

Туулын хурдны замын төслийг хуульд нийцүүлтэл түр хугацаанд зогсоож буйг Байгаль орчин, уур амьсгалын өөрчлөлтийн яамнаас мэдээллээ.

Тодруулбал Туулын хурдны замын төслийн хэрэгжилттэй холбогдуулан салбарын сайд Ц.Сандаг-Очир нийслэлийн Засаг даргын орлогч Т.Даваадалай болон төслийн гүйцэтгэгч БНХАУ-ын хөрөнгө оруулалттай “Хаоюань женерал констракшн” ХХК-ийн төлөөлөлтэй уулзлаа. 

Уулзалтын эхэнд Байгаль орчин, уур амьсгалын өөрчлөлтийн сайд Ц.Сандаг-Очир “Төслийн хэрэгжилтийн явцад байгаль орчны хууль тогтоомжийг чанд мөрдөх нь яамны үүрэг. Иймд холбогдох хууль, тогтоомж, үнэлгээ, стандарт, шаардлагыг бүрэн хангаж ажиллах, байгаль орчны менежментийн төлөвлөгөөг батлуулан, үйл ажиллагааг зөвхөн баталгаажсан судалгаа, тооцоонд тулгуурлан хэрэгжүүлэх ёстой” гэдгийг онцлов.