Тамхи болон гурилан бүтээгдэхүүний үнэ 300-400 төгрөгөөр нэмэгдэв

Өнгөрсөн амралтын өдрүүдэд өргөн хэрэглээний барааны үнэ тэр дундаа гурилан бүтээгдэхүүний үнэ 15-23 хувиар буюу 300-400 төгрөгөөр нэмэгдсэн гэдгийг худалдаа эрхлэгчид хэлж байгаа юм. Өөрөөр хэлбэл, гурилан бүтээгдэхүүний үнэ хамгийн багадаа 6500 төгрөг бол хамгийн ихдээ дунджаар 12 мянган төгрөгийн үнэтэй байгаа ажээ. Мөн гурилын үнэ килограмм тутамд 50 төгрөгөөр нэмэгдсэн байна. Үүнээс гадна тамхины үнэ мөн 300 төгрөгөөр нэмэгджээ.

Учир нь Ойрхи дорнодод үүсээд байгаа нөхцөл байдлаас шалтгаан өнгөрсөн сард дизель түлшний үнийг литр тутамд 1100 орчим төгрөгөөр нэмсэн. Харин махны үнэ хаданд гарч өмнө жилүүдэд байгаагүйгээр нэмэгдээд буй. Тодруулбал, үхрийн мах ганцхан сарын дотор 6000-8000 орчим төгрөгөөр нэмэгдээд байгаа юм.

Гуравдугаар сард үхрийн мах 28 мянган төгрөг байсан бол өнөөдрийн байдлаар 36 мянган төгрөгт хүрээд байна.

Сүүлийн жилүүдэд өргөн хэрэглээний барааны үнэ өдөр тутам бага багаар нэмэгдсээр сүүлийн таван жилд монгол төмс 124.1 хувь, гурил 111.5 хувь, ургамлын тос 80.3 хувь, өндөг 50.5 хувиар тус тус өссөн бол цагаан будааны үнэ 12.3 хувиар нэмэгджээ. Энэ хэрээр иргэд үнийн өсөлтийн дарамтад орж, авч буй цалин нь хаанаа ч хүрэхгүй байна.